- Диданд: 51
ШАНБЕГИИ УМУМӢ ДАР ҶАМОАТҲОИ ШАҲРАКУ ДЕҲОТИ НОҲИЯИ РӮДАКӢ
Рӯз, 16-уми май бо ташаббуси Мақомоти иҷроияи ҳокимияти давлатии ноҳияи Рӯдакӣ дар тамоми ҷамоатҳои шаҳраку деҳоти ноҳия шанбегии умумӣ баргузор гардид. Чорабинии мазкур дар доираи омодагиҳо ба истиқболи сазовори ҷашни 35-солагии Истиқлоли давлатии Ҷумҳурии Тоҷикистон роҳандозӣ гардида, сокинон, кормандони корхонаву муассисаҳо, ташкилотҳо, соҳибкорон ва ҷавонони ноҳия дар он иштироки фаъолона намуданд.
Иштирокчиёни шанбегӣ бо ҳисси баланди ватандӯстиву масъулиятшиносӣ ба тоза намудани кӯчаву маҳаллаҳо, роҳҳои автомобилгард, ҷӯйборҳо, ҳудуди корхонаву муассисаҳо, боғу гулгаштҳо, бозорҳо, нуқтаҳои савдо ва дигар мавзеъҳои ҷамъиятӣ машғул шуданд. Ҳамзамон, дар як қатор маҳаллаҳо корҳои сафедкунӣ, шинонидани гулу буттаҳои ороишӣ ва оро додани кӯчаҳо бо шиору овезаҳои идона анҷом дода шуд. Кормандони корхонаву муассисаҳои ноҳия низ дар корҳои ободониву тозагӣ саҳми назаррас гузошта, барои зебову озода нигоҳ доштани муҳити атроф ва муҳайё намудани фазои идона иқдомҳои созандаро амалӣ намуданд.
Сокинони ноҳияи Рӯдакӣ бо ҷонибдорӣ аз сиёсати созандаву бунёдкоронаи Ҳукумати Ҷумҳурии Тоҷикистон пайваста барои ободу зебо гардонидани диёри худ саҳм мегузоранд. Корҳои ободониву созандагӣ бахшида ба ҷашни муқаддаси 35-солагии Истиқлоли давлатии Ҷумҳурии Тоҷикистон дар тамоми ҳудуди ноҳия идома доранд.
- Диданд: 48
ИШТИРОКИ ФАЪОЛОНАИ ҲУНАРМАНДОНИ НОҲИЯ ДАР ДАВРИ ҶУМҲУРИЯВИИ ФЕСТИВАЛ-ОЗМУНИ «БЕҲТАРИН УСТО ВА ШОГИРД»
Рӯз, 13-уми майи соли 2026 дар Муассисаи давлатии «Боғи Ирам»-и шаҳри Душанбе даври ниҳоии Фестивал-озмуни ҷумҳуриявии ҳунармандону косибон таҳти унвони «Беҳтарин усто ва шогирд» баргузор ва ҷамъбаст гардид. Фестивал–озмун дар асоси «Ҷадвали баргузории ҷашну солгард, фестивалу намоиш, иду озмунҳои фарҳангию маърифатӣ ва анъанаю ҳунарҳои мардумӣ дар Ҷумҳурии Тоҷикистон барои соли 2026», ки бо Амри Президенти Ҷумҳурии Тоҷикистон аз 2 январи соли 2026 ба тасвиб расидааст, гузаронида мешавад.
Дар баробари намояндагони дигар шаҳру ноҳияҳои ҷумҳурӣ ҳунармандони ноҳияи Рӯдакӣ низ дар ин чорабинии фарҳангӣ фаъолона ширкат варзиданд. Ҳайати ҳунармандони ноҳияро муовини раиси ноҳия Зарина Исмоилзода, мудири бахши рушди сайёҳии ноҳия Фирӯза Ҳасанова, мудири бахши рушди иҷтимоӣ ва робита бо ҷомеа Мунира Мирзозода, директори Маркази рушди ҳунармандӣ ва малакаҳои касбии муосир Фирӯз Гурезов ва сардори раёсати Агентии меҳнат ва шуғли аҳолӣ Одилҷон Муминов ҳамроҳи намуданд.
Дар доираи фестивал ғолибон аз рӯйи чор номинатсия муайян гардида, бо диплом ва туҳфаҳои хотиравӣ қадрдонӣ шуданд. Боиси ифтихор аст, ки намояндагони ноҳияи Рӯдакӣ низ миёни беҳтаринҳо қарор гирифта, дар номинатсияи «Коркарди металл ва маснуоти тайёри филизӣ» усто Абдуғафор Ҳиматов ва шогирд Сулаймон Ҳиматов соҳиби ҷойи сеюм гардиданд. Аз номинатсияи «Бофандагӣ ва дӯзандагӣ» намояндагони ноҳия барои иштироки фаъолона соҳиби Ифтихорномаи Вазорати меҳнат, муҳоҷират ва шуғли аҳолии Ҷумҳурии Тоҷикистон гардиданд. Ҳамзамон, ба Мақомоти иҷроияи ҳокимияти давлатии ноҳияи Рӯдакӣ Сипосномаи Вазорати меҳнат, муҳоҷират ва шуғли аҳолии Ҷумҳурии Тоҷикистон тақдим гардид.
Зимни ҷамъбасти фестивал таъкид гардид, ки чунин озмунҳо барои рушди ҳунарҳои мардумӣ, баланд бардоштани маҳорати касбӣ, тарғиби фарҳанги миллӣ ва тарбияи насли ҷавон дар руҳияи меҳнатдӯстиву ҳунармандӣ аҳаммияти муҳим доранд.
- Диданд: 39
Санаи 13-уми майи соли 2026 дар Муассисаи давлатии таълимии «Коллеҷи техникию омӯзгории ноҳияи Рӯдакӣ» конференсияи илмӣ-назариявӣ бахшида ба Рӯзи байналмилалии оила таҳти унвони «Оила-рамзи муҳаббат, вафо ва ҳамдигарфаҳмӣ» бо иштироки меҳмонони расмӣ, омӯзгорон ва донишҷӯён баргузор гардид.
Дар чорабинии мазкур муовини раиси ноҳияи Рӯдакӣ муҳтарам Давлатзода Неъматулло, мудири шуъбаи кор бо занон ва оилаи назди Мақомоти иҷроияи ҳокимияти давлатии ноҳияи Рӯдакӣ Усмонзода Моҳира, сармуҳаррири рӯзномаи «Насими айём» Алимова Умеда, ҳайати омӯзгорон ва донишҷӯёни муассисаи таълимӣ иштирок намуданд. Конференсия бо сухани ифтитоҳии муовини директор оид ба илм ва робитаҳои хориҷии муассиса Тоҳир Одилов оғоз гардида, мавсуф ҳозиринро ба муносибати Рӯзи байналмилалии оила табрик намуда, нақши оиларо ҳамчун пояи муҳими ҷомеа ва омили тарбияи насли солим арзёбӣ намуд.
Сипас, муовини раиси ноҳияи Рӯдакӣ муҳтарам Давлатзода Неъматулло зимни суханронии худ таъкид намуд, ки сиёсати иҷтимоии давлату Ҳукумати Ҷумҳурии Тоҷикистон таҳти роҳбарии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба таҳкими арзишҳои оилавӣ, ҳифзи ҳуқуқи занону кӯдакон ва тарбияи ҷавонон равона гардидааст. Мавсуф оиларо ҳамчун рукни асосии суботи ҷомеа ва кафили пешрафти давлатдорӣ арзёбӣ кард. Дар идома мудири шуъбаи кор бо занон ва оилаи назди Мақомоти иҷроияи ҳокимияти давлатии ноҳияи Рӯдакӣ Усмонзода Моҳира оид ба мақоми зан дар ҷомеа, таҳкими муносибатҳои оилавӣ ва масъулияти падару модар дар тарбияи фарзанд ибрози назар намуда, ҷавононро ба эҳтироми арзишҳои миллӣ ва оиладорӣ ҳидоят намуд.
Ҳамчунин, сармуҳаррири рӯзномаи «Насими айём» Алимова Умеда доир ба аҳамияти маънавии оила, фарҳанги муносибатҳои хонаводагӣ ва нақши воситаҳои ахбори омма дар тарғиби арзишҳои оилавӣ суханронӣ карда, баргузории чунин чорабиниҳоро барои баланд бардоштани маърифати ҷомеа муҳим арзёбӣ намуд. Дар қисмати илмии конференсия омӯзгори кафедраи забонҳо Гурезова Гулрухсор дар мавзуи муҳаббат ва вафо ҳамчун асоси устувории оила маърӯза намуда, нақши тарбияи ахлоқиро дар муҳити оила муҳим шуморид. Инчунин, омӯзгори кафедраи забонҳо Абдуллоева Парвина оид ба масъалаҳои ҳамдигарфаҳмӣ, эҳтироми байниҳамдигарӣ ва саҳми оила дар ташаккули шахсияти комил андешаронӣ намуд.
Дар фарҷоми конференсия иштирокчиён баргузории чунин ҳамоишҳои илмӣ-маърифатиро барои таҳкими арзишҳои миллӣ, баланд бардоштани маърифати оиладорӣ ва тарбияи насли ватандӯст муҳим арзёбӣ намуда, ба ташаббускорони чорабинӣ изҳори сипосу миннатдорӣ баён карданд.
Саҳифаи 8 аз 91
1USD
1EUR
1RUB