Диданд: 17

Ҳамдиёрони азиз, сокинони сарбаланд ва шарафманди ноҳияи Рӯдакӣ!

Бо камоли эҳтиром ва самимияти беандоза ҳамаи шуморо ба муносибати Иди саиди Фитр самимона табрику таҳният мегӯям ва ба ҳамаи Шумо тансиҳатӣ, хотири ҷамъ ва ба хонадонатон саодати рӯзгор ва баракат орзу менамоям.
Хурсандиовар аст, ки аҳли мардум Иди саиди Фитрро ҳамасола бо амалҳои хайру савоб ва шодмониву хушҳолӣ истиқбол мегиранд ва шукрона мекунем, ки ба шарофати истиқлолу озодии кишварамон Иди саиди Фитр ва дигар ойину суннатҳои миллиамонро дар шароити сулҳу оромӣ ва суботи комили сиёсӣ таҷлил менамоем.
Дар ин рӯзҳо мардуми мо аъмоли шоистаи инсонӣ, аз ҷумла кӯмаку дастгирӣ ба ятимону маъюбон, ниёзмандону камбизоатҳо, аёдати падару модарон ва калонсолонро анҷом медиҳанд ва дар ҳаққи гузаштагон дуои хайр мефиристанд.
Тибқи таълимоти дини мубини ислом Худованд ин рӯзро барои ҳамаи мусулмонон ҳамчун рӯзи қабули дуои нек дар ҳаққи ҳамдигар, оромиву ободии Ватан ва анҷом додани корҳои хайру савоб муқаррар кардааст.
Яъне, ҳикмати иди саиди Фитр ва дар маҷмуъ, моҳи шарифи Рамазон ҳамдигарфаҳмиву сарҷамъии аҳли ҷомеа ва густариши арзишҳои неку созандаи ахлоқиву маънавӣ, аз ҷумла эҳтирому самимият бо якдигар ва ҳамдигарфаҳмӣ дар байни одамон мебошад.
Рӯза доштан ҳамчун рукни муҳими бинои мусулмонӣ гувоҳи он аст, ки таълимоти ислом саршори ғояҳои эҳсону накӯкорист, ҳусни муошират бо аҳли хонадон, улфату муҳаббат ба наздикону пайвандон, муомилаи нек бо ҳамсоягон, бо дӯстону ҳамкорон, раҳму шафқат ба беморону нотавонон, ёриву ғамхорӣ ба дармондагону бечорагон, ёди хайр аз гузаштагон аст.
Одоби исломӣ ҷавонмардиву олиҳимматӣ, гузашт кардан ва бахшидан аст, интиқом наҷустан аст, кинаву адоват ва хусумат надоштан аст, бурдборӣ, чеҳраи хандон ва оғӯши кушод, сипосгузорӣ ва қадрдонӣ, аз манфиати худ боло гузоштани манфиатҳои ҷомеа ва миллату давлат, раҳоӣ аз банди ҳавову ҳавасҳост.

Ислом покиву парҳезгорӣ аст, илму адаб ва панду насиҳат аст.

Яке аз ҳикматҳои аслии моҳи мубораки шарифи Рамазон дар он ифода меёбад, ки инсон бо эҳсоси гуруснагиву ташнагӣ аз ҳолати ятимону маъюбон, беморону эҳтиёҷмандон ва шахсони камбизоат бештар огоҳ мегардад ва барои осон намудани мушкилоти онҳо мувофиқи имконияту тавони худ дасти кумак дароз мекунад. Зеро маънии рӯзадорӣ ва рӯза гирифтан дар табиати одамон, пеш аз ҳама пок нигоҳ доштани дилу забон, зоҳиру ботин, бо муомилаи неку меҳрубонӣ ба ҷо овардани иззати инсон ва раҳму шафқатро бедор месозад.
Ҳамчунин, ҳар як фарди муъмин бояд дар хотир дошта бошад, ки дар моҳи шарифи Рамазон амалҳои неку писандида, аз ҷумла хайроту садақа на ба хотири зоҳирпарастӣ, намоишкорӣ, исрофкорӣ ва худро аз дигарон болову беҳтар нишон додан, балки барои ба даст овардани хушнудии Худованд анҷом дода мешаванд.
Фазилати моҳи Рамазон дар ботини ҳар як мусулмон ташаккул додани хислати ҷавонмардӣ ва саховатмандӣ мебошад.
Ҳамаи мо аз вазъияти сиёсии ҷаҳони муосир хуб огоҳӣ дорем.
Аз ин лиҳоз, ҳамдиёрони азиз, аз пештара боз ҳам, ҳама сарҷамъу муттаҳид, ватани маҳбуби орому осудаамонро сидқан дӯст дорем, ватандӯсту ватанпарвар, оилаи солим бо тарбияи хуби фарзандон ва ҳамешагӣ дар фикру зикри ободии Ватан, миллат ва давлат бошем.
Фарзандонро бо интизоми намунавӣ ва садоқат ба Ватан, дониши хубу аъло, муоширати самимона, азбар намудани на кам аз ду забонҳои хориҷӣ, гиромидошт ва эҳтиром ба падару модар, соҳибкасб шудан, шомил нашудан ба ҳизбу ҳаракатҳои тундгарову ифротӣ, хабардошт аз нооромиву низоъҳо дар минтақаҳои гуногуни олам ва даҳшату оқибатҳои фалокатбори терроризму экстремизм, даст назадан ба ҷинояту ҷинояткорӣ, эҳтироми қонунҳо ва риояи ҳатмии талаботҳои он, ба воя расонем.
Маврид ба зикр аст, ки дар саросари кишвар, аз он ҷумла дар ноҳия маъракаи баҳории даъвати ҷавонон ба сафи Қувваҳои Мусаллаҳи Ҷумҳурии Тоҷикистон оғоз мегардад ва мебояд фарзандони синну соли даъватиро ба адои хизмати ҳарбӣ ҳамчун қарзи муқаддас ва садоқат дар пеши Ватан-Модар сафарбар намоем.

Итминон дорам, мардуми олиҳиммату саховатманд ва бонангу номуси ноҳияамон дар чунин раванди неку созанда дар доираи омодагӣ ба 35 – солагии Истиқлоли давлатии Тоҷикистони азизамон вусъати бештар пайдо мекунанд ва бо дастгириву ғамхориҳои пайвастаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷашни бузурги миллиамонро дар шароити орому осудаи Ватани азизамон – Тоҷикистони биҳиштосо истиқбол мегирем.

Бо чунин нияту орзуҳои нек бори дигар, Иди шарифи Рамазонро ба мардуми шарафманди ноҳия табрику таҳният намуда, барои сокинони ноҳияамон хонаи обод, ризқу рӯзии фаровон, тандурустӣ, фарохдастиву имони комил ва саодати рӯзгорро орзу менамоям.

ИД МУБОРАК, ҲАМДИЁРОНИ АЗИЗ!

Диданд: 19
Бо эҳтироми хоса ва эҳсоси баланд ҳамаи кормандон ва собиқадорони мақомоти Прокуратураи ноҳияро ба муносибати Рӯзи иди касбиашон табрик мегӯям.
Мақомоти прокуратура яке аз сохторҳои муҳимми низоми давлатдорӣ ба шумор рафта, вазифаи асосии онҳо аз таъмини волоияти қонун, таҳкими қонуният ва тартиботи ҳуқуқӣ бо мақсади ҳифзи мустақилият ва соҳибихтиёрии мамлакат, ҳуқуқу озодиҳои инсон ва шаҳрванд, асосҳои демократии ҳокимияти давлатӣ, вазъи ҳуқуқии мақомоти маҳаллии ҳокимияти давлатӣ, мақомоти худидоракунии маҳаллӣ, дигар мақомоти давлатӣ, иттиҳодияҳои ҷамъиятӣ, динӣ, ҳизбҳои сиёсӣ ва дигар сохторҳои ғайридавлатӣ иборат аст.
Дар солҳои Истиқлоли давлатӣ мақомоти Прокуратураи Тоҷикистон чун дигар сохторҳои давлатӣ таҳаввулоти зиёдро аз cap гузаронида, дар ҷомеа ҳамчун ниҳоди мустақил ва ҷавобгӯ ба принсипҳои демократии давлатдорӣ ҷойгоҳи шоиста касб намуд. Дар ин давра барои фаъолияти самараноки мақомоти прокуратура заминаҳои устувори ҳуқуқӣ-конститутсионӣ ташаккул ёфта, ваколату салоҳияти назоратию мурофиавии он дақиқ муайян шуданд. Самтҳои асосии фаъолияти прокуратура бо назардошти манфиатҳои миллӣ, ҳифзи арзишҳои истиқлолият, вазъи қонуният ва тартиботи ҳуқуқӣ дар мамлакат мушаххас гардиданд. Заминаҳои рушд ва таҳкими фаъолияти мақомоти прокуратура дар Тоҷикистон ҳамчун ниҳоди мустақили давлатӣ ба таърихи давлатдории навини тоҷикон, яъне ба даст овардани Истиқлолияти давлатӣ пайванди ногусастанӣ дорад.
Таърих ва роҳи тайкардаи мақомоти прокуратура дар даврони истиқлолият бозгӯи он аст, ки таҳкиму тавсеаи фаъолияти ин сохтор таҳти ҳидояту дастгириҳои Президенти Ҷумҳурии Тоҷикистон муҳтарам Эмомалӣ Раҳмон имконпазир гардида, мавқеи он дар низоми ҳуқуқии мамлакат боло рафт. Ҳоло мақомоти прокуратура фаъолияти худро ба замони муосир ва рушди босуръати технологияи иттилоотӣ мутобиқ намуда, барои беҳбуд бахшидан ба кори ҳаррӯза ҷиҳати назорати риояи дақиқ ва иҷрои якхелаи қонунҳо дар саросари мамлакат тадбирҳои мушаххас андешидааст.
Имрӯз самтҳои асосии фаъолияти мақомоти прокуратура ба назорати риояи иҷрои якхелаи қонунҳо, таҳкими волоияти қонун ва суботу амнияти мамлакат нигаронида шудааст. Инчунин, назорат ба риояи ҳуқуқу озодиҳои инсон ва шаҳрванд, ки арзиши олӣ эътироф гардидааст, ҳифзи ҳуқуқу озодиҳои инсон ва шаҳрвандон, манфиатҳои давлат, шаклҳои гуногуни моликияти давлатӣ ва ғайридавлатӣ дар мурофиаи судӣ, назорат ба риоя ва иҷрои қонунҳо, тафтиши ҷиноятҳо, таҳияи чораҳои пешгирии ҷиноятҳо, мубориза бар зидди коррупсия, терроризм, экстремизм ва дигар ҳуқуқвайронкуниҳо якҷоя бо дигар мақомоти давлатӣ, ҳамоҳангсозии фаъолияти мақомоти ҳифзи ҳуқуқ оид ба мубориза бар зидди ҷинояткорӣ ва пешгирии он, коррупсия ва дигар ҳуқуқвайронкуниҳо аз рисолатҳои дигари мақомоти прокуратураи Тоҷикистон мебошанд.
Бори дигар ҳамаи кормандон ва собиқадорони мақомоти прокуратураро ба муносибати Рӯзи иди касбӣ муборакбод мегӯям.
Ид муборак!

Диданд: 16

      11-уми март дар толори Коллеҷи фарҳанги ҷумҳуриявии ба номи П. Буйдоқови ноҳияи Рӯдакӣ ба муносибати Рӯзи матбуоти тоҷик Конфронси илмӣ-амалӣ таҳти унвони «Матбуот – оинаи рӯзгор ва муҳимтарин рукни ҷомеа» баргузор гардид. Дар чорабинӣ намояндагони мақомоти давлатӣ, собиқадорони соҳаи матбуот, кормандони воситаҳои ахбори омма, роҳбарони муассисаҳо ва намояндагони ҷамоатҳои шаҳраку деҳоти ноҳия иштирок намуданд.

     Чорабиниро сармуҳаррири рӯзномаи ноҳиявии «Насими айём» Умеда Алимова ҳусни оғоз бахшида, ҳозиринро бо Рӯзи матбуоти тоҷик самимона табрик намуд. Зикр гардид, ки ҳамасола 11 март ҳамчун иди касбии кормандони воситаҳои ахбори омма ҷашн гирифта мешавад. Ин сана ба нашри нахустин шумораи рӯзномаи таърихии “Бухорои Шариф” иртибот дошта, яке аз саҳифаҳои муҳим дар таърихи рушди матбуоти тоҷик ба ҳисоб меравад. Имсол аз нашри аввалин шумораи ин рӯзнома 114 сол сипарӣ гардид.

     Дар идома, муовини раиси ноҳия Неъматулло Давлатзода суханронӣ намуда, паёми шодбошии иҷрокунандаи вазифаи раиси ноҳия Нусратулло Салимзодаро ба аҳли қалам ва собиқадорони матбуот расонид. Таъкид гардид, ки имрӯзҳо, дар шароити зудтағйирёбандаи ҷаҳон матбуоти даврӣ ва дигар воситаҳои ахбори омма ба силоҳи қудратманди идеологии давлатҳо табдил ёфтааст. Дар шароити ҷаҳонишавӣ ва асри пешрафти технологияи иттилоотӣ нақш ва аҳаммияти матбуоти даврӣ рӯз аз рӯз афзун мешавад. Матбуот яке аз омили меҳварӣ ва қавии таъсиргузор дар ташаккул ва рушди мафкураи миллӣ ба ҳисоб рафта, он ҳамчун василаи муҳимми таҳаввулоти мафкураи миллӣ ва тарғибгари арзишҳои фарҳангӣ, таърихӣ ва сиёсӣ ба шумор меравад. Нақши матбуот дар такмили низоми давлатдорӣ ва устувории суботу оромии сартосарӣ ва тақвияти ваҳдати миллӣ дар ҷомеа бағоят бузург арзёбӣ гардидааст.

     Гуфта шуд, ки дар ноҳияи Рӯдакӣ баҳри таъмини фазои иттилоотӣ бо ахбори саҳеҳ, санҷидашуда ва расмӣ рӯзномаи ноҳиявии «Насими айём» фаъолият намуда, ҳамарӯза самтҳои асосии ҳаёти ҷамъиятӣ, ахбори сиёсӣ, иҷтимоӣ, иқтисодӣ ва фарҳангии ноҳияро ба таври густурда инъикос месозад. Бар иловаи ин, нашрияҳои соҳавии ноҳия низ мавзуъҳои мубрами рӯзро дар самту соҳаи хеш мавриди баррасӣ қарор медиҳанд.

     Сипас, раиси Иттифоқи журналистони Тоҷикистон Зинатуллоҳ Исмоилзода суханронӣ намуда, нақши матбуотро дар рушди ҷомеаи демократӣ муҳим арзёбӣ кард. Ӯ иброз дошт, ки журналистика бояд ҳамеша ба ҳақиқат, адолат ва манфиатҳои ҷомеа содиқ бошад. Дар идома, прокурори ноҳияи Рӯдакӣ Раҷабзода Мутеъулло ва муовини раиси суди ноҳия Исмоил Муминзода баромад карда, аҳли қаламро бо иди касбӣ табрик гуфта, нақши матбуотро дар баланд бардоштани маърифати ҳуқуқии шаҳрвандон ва тарғиби арзишҳои миллӣ муҳим арзёбӣ намуданд.

     Дар идомаи конфронс корманди рӯзномаи ноҳиявии «Насими айём» Хайриддин Идиев бо маърузаи илмӣ таҳти унвони «Аз таърихи рӯзномаи “Насими айём”» баромад намуд. Дар маъруза таърихи таъсисёбӣ, марҳилаҳои рушд ва саҳми рӯзнома дар инъикоси ҳаёти иҷтимоиву фарҳангии ноҳияи Рӯдакӣ мавриди таҳлил қарор гирифт. Қайд гардид, ки нашрия дар тули фаъолияти худ ҳамеша ба масъалаҳои муҳимми ҷомеа таваҷҷуҳ зоҳир намуда, ҳамчун минбари озод барои ибрози андешаҳо хизмат мекунад.

     Дар қисмати қадрдонии чорабинӣ дар фазои идона як қатор собиқадорон, кормандони рӯзномаи “Насими айём” ва муаллифони фаъол барои хизматҳои шоён дар самти рушди матбуоти даврӣ ва ба роҳ мондани ҳамкориҳои эҷодӣ бо Сипосномаи Мақомоти иҷроияи ҳокимияти давлатии ноҳияи Рӯдакӣ ва Сипосномаи Муассисаи давлатии рӯзномаи “Насими айём” ва туҳфаҳои хотиравӣ мукофотонида шуданд.

   

 

  1. ПАЁМИ ТАБРИКИИ ИҶРОКУНАНДАИ ВАЗИФАИ РАИСИ НОҲИЯИ РӮДАКӢ НУСРАТУЛЛО САЛИМЗОДА БАХШИДА БА РӮЗИ МАТБУОТИ ТОҶИК
  2. ПАЁМИ ТАБРИКИИ ИҶРОКУНАНДАИ ВАЗИФАИ РАИСИ НОҲИЯИ РӮДАКӢ САЛИМЗОДА НУСРАТУЛЛО БАХШИДА БА РӮЗИ МОДАР
  3. НОМЗАДИ АРЗАНДА ПЕШБАРӢ ГАРДИД
  4. РОҲПАЙМОИИ НОҲИЯВӢ ТАҲТИ УНВОНИ «ТОҶИКОНА МЕПӮШЕМ» ДАР НОҲИЯИ РӮДАКӢ