- Диданд: 21
ТАҶЛИЛИ ТАНТАНАВИИ РӮЗИ БАЙНАЛМИЛАЛИИ ОИЛА ДАР НОҲИЯИ РӮДАКӢ
Дар Ҷумҳурии Тоҷикистон оила ҳамчун ниҳоди муқаддас эътироф гардида, давлат ва Ҳукумат ҷиҳати иҷрои муқаррароту уҳдадориҳои хеш дар самти танзими муносибатҳои ҳуқуқӣ, таъмини зиндагии шоиста ва муҳайё кардани шароити созгори иҷтимоӣ барои оилаҳои ҷавон пайваста талош меварзад. Дар радифи таҷлил аз Рӯзи байналмилалии оила дар шаҳру навоҳии мамлакат конфронсу ҳамоишҳо ва чорабиниҳои сатҳи гуногун гузаронида шуда, масъалаҳои марбути оила, ҳаёти хонаводагӣ, тарбияи фарзандон ва ғайра мавриди баррасӣ қарор мегиранд.
Ба истиқболи Рӯзи байналмилалии оила рӯзи 13-уми майи соли 2024 бо ташаббуси бахши сабти асноди ҳолати шаҳрвандии Мақомоти иҷроияи ҳокимияти давлатии ноҳияи Рӯдакӣ дар толори Қасри фарҳанги ноҳия ҷамъомади тантанавӣ доир гардид.
Муовини раиси ноҳияи Рӯдакӣ Муҳаммадшариф Бобошоҳзода бо сухани ифтитоҳӣ ба ҷамъомад ҳусни оғоз бахшида, ҳозиринро ба муносибати Рӯзи байналмилалии оила табрик намуд. Зикр гардид, ки гиромӣ доштани оила ҷузъи муҳимми фарҳанги волои мардуми мо ба шумор меравад. Аз ин рӯ, ҳар яки моро зарур аст, ки баҳри пойдории оила, тақвияти мақоми оила ҳамчун ниҳоди муқаддас ва пешгирии ҷудошавии оилаҳои ҷавон саъю кӯшиш намоем.
Дар идома, мудири бахши сабти асноди ҳолати шаҳрвандии ноҳия Зебониссо Расулзода оид ба мавзуъҳои ҳуқуқу уҳдадориҳо, муносибат, вазифа ва рисолати оила дар ҷомеа суханронӣ намуд. Ӯ зикр кард, ки дар таълиму тарбияи насли наврас, пеш аз ҳама, падару модар саҳми аввалиндараҷа доранд. Волидонро мебояд, ки барои ташаккули ҷомеаи солим ба таълиму тарбияи фарзанд ва таъмини фазои созгори оилавӣ диққати ҷиддӣ диҳанд.
Дар ҷараëни ҷамъомад ба чор ҷуфт навхонадорон шаҳодатномаи ақди никоҳ тақдим гардида, ҳамзамон ба волидони ҳашт нафар тифлакони навзод шаҳодатномаи таваллуд дода шуд.
Инчунин, аз ҷониби бахши сабти асноди ҳолати шаҳрвандии ноҳия се оилаи намунавӣ муайян ва бо Ифтихорномаву туҳфаҳои хотиравӣ қадрдонӣ гардиданд. Ҷойи аввал ба оилаи Султоновҳо аз ҷамоати деҳоти Чоргултеппа дода шуд. Аз ин оилаи намунавӣ чор нафар дар сафи Қувваҳои Мусаллаҳи кишвар хизмат намудааст. Ҷойи дуюмро ба оилаи Шариповҳо аз ҷамоати деҳоти Роҳатӣ доданд. Ҷойи сеюм ба оилаи Алиевҳо аз ҷамоати деҳоти Гулистон, ки се нафар фарзандашон хизмати Модар-Ватанро адо кардаанд, сазовор дониста шуд.
Бояд қайд намуд, барои муайян намудани оилаи намунавӣ дар сатҳи ҷамоатҳо низ озмун баргузор гардида буд. Оилаҳои намунавӣ аз ҷамоатҳои шаҳраку деҳоти ноҳия, аз ҷумла, оилаи Азизовҳо аз ҷамоати шаҳраки Сомониён, оилаи Алибековҳо аз ҷамоати деҳоти Зайнабобод ва дигар оилаҳои намунавӣ, ки дар сатҳи ҷамоат ғолиб гардида буданд, дар чорабинӣ ширкат варзиданд.
Дар хотимаи ҷамъомад аз ҷониби сарояндаи ҷавону умедбахш Вайсиддини Шариф ва ҳунармандони бахши фарҳанги ноҳия базми савту суруд ва барномаи рангини консертӣ манзури иштирокдорон гардид.
- Диданд: 34
ОЗМУНИ "КАДБОНУИ БЕҲТАРИН"
Дар санаи 9-уми марти соли 2024 дар боғи фарҳангӣ-фароғатии ноҳия даври ноҳиявии озмуни “Кадбонуи беҳтарин” баргузор гардид. Дар озмун занони соҳибзавқу ҳунармандони моҳир иштирок карда, ҳама намуди таомҳои миллии тоҷиконаро омода намуда, ба маърази тамошо гузоштанд.
Раиси ноҳияи Рӯдакӣ Абдуғаффор Ҳикматуллозода бо ҳамроҳии муовини якум, роҳбари дастгоҳи ноҳия ва раисони ҷамоатҳои шаҳраку деҳот аз чорабинӣ дидан карда, ба ҳунари иштирокчиён баҳои баланд дода, ба онҳо бурдбориҳо орзу намуданд.
Бояд гуфт, ки мақсад аз баргузории озмун ҳавасмандгардонии занону бонувони ҳунарманд ва эҳёи таомҳои миллӣ ва омода кардани ҷавондухтарон ба ҳаёти мустақилона, баланд бардоштани маърифати хонадорӣ ва завқи дастархонороии онҳо мебошад.
Пас аз натиҷагирии озмун ғолибон бо Сипоснома, туҳфаҳои пулӣ ва хотиравии Мақомоти иҷроияи ҳокимияти давлатии ноҳияи Рӯдакӣ мукофотонида шуданд
- Диданд: 45
МОДАР - САРЧАШМАИ МЕҲРУ ҲАЁТ
Рӯзи 7-уми марти соли 2024 ба муносибати Рӯзи Модар дар Қасри фарҳанги ноҳияи Рӯдакӣ чорабинии тантанавӣ баргузор шуд. Дар чорабинӣ раиси ноҳияи Рӯдакӣ Абдуғаффор Ҳикматуллозода, намояндагони сохторҳои давлатӣ, собиқадорон, занону модарони фаъоли ноҳия ва ҷавондухтарон ширкат варзиданд.
Дар оғози чорабинӣ иштирокчиён намоишгоҳи осори санъату адабиёт ва ҳунарҳои мардумиро, ки занону модарони чирадасти ноҳия дар саҳни Қасри фарҳанг ороста буданд, тамошо карданд.
Сипас, дар толори Қасри фарҳанг бо садо додани Суруди миллӣ чорабирии идона шуруъ шуд. Раиси ноҳияи Рӯдакӣ Абдуғаффор Ҳикматуллозода зимни сухани табрикӣ тамоми модарону бонувони ноҳияро ба муносибати Рӯзи Модар самимона табрику муборакбод гуфта, ба онҳо саломативу сарбаландӣ таманно кард. Гуфта шуд, ки таҷлили Рӯзи Модар, ки ҳамасола ба санаи 8-уми март рост меояд, басо рамзист, зеро ин ҷашни муқаддас аз бедориву эҳёи табиат, оғози фасли зебоиофари баҳор ва фаро расидани Наврӯзи хуҷастапай мужда мерасонад.
Зикр шуд, ки имрӯзҳо дар ноҳияи Рӯдакӣ вобаста ба баланд бардоштани мақому манзалати занон «Барномаи давлатии тарбия, интихоб ва ҷобаҷогузории кадрҳои роҳбарикунандаи Ҷумҳурии Тоҷикистон аз ҳисоби занону духтарони лаёқатманд барои солҳои 2023-2030» ва Стратегияи миллии фаъолгардонии нақши занон дар ноҳияи Рӯдакӣ барои солҳои 2021-2030 бомуваффақона амалӣ гардида истодаанд.
Дар ноҳияи Рӯдакӣ теъдоди занону духтарони соҳибмаълумот сол ба сол зиёд гардида, онҳо дар ҳамаи соҳаҳои хоҷагии халқи ноҳия кору фаъолият доранд. Аз ҷумла, дар мақомоти ҳифзи ҳуқуқ 18 нафар зан фаъолият менамояд, ки аз онҳо 2 нафар занони роҳбарикунанда мебошанд. Дар соҳаи маориф 4027 нафар (64 нафар роҳбар), соҳаи тандурустӣ 1172 нафар (27 нафар роҳбар), соҳаи фарҳанг 80 нафар (5 нафар роҳбар) кору фаъолият доранд.
Шумораи занони роҳбари хоҷагиҳои деҳқонӣ 517 нафарро ташкил медиҳанд. Шумораи соҳибкорон аз ҳисоби занон 3741 нафар мебошад. Шумораи намояндагони Маҷлиси вакилони халқи ноҳия аз ҳисоби занон 11 нафар ва вакилони ҷамоати деҳот бошад 82 нафар аз ҳисоби занон мебошанд. Ҳамзамон, 410 нафар занону духтарони хонанишин низ ба касбомӯзӣ фаро гирифта шудаанд, ки саҳми онҳо низ дар пешрафти ҳаёти ҷомеа назаррас аст.
Пас аз сухани табрикӣ раиси ноҳия ба як қатор занону модарони фаъол барои саҳми арзандаашон дар пешрафти соҳаҳои гуногуни ҳаёти ҷомеа Ифтихорномаи Мақомоти иҷроияи ҳокимияти давлатии ноҳияи Рӯдакиро тақдим кард. Ҳамчунин, аз ҷониби раиси ноҳия ба ғолибони мусобиқаи волейбол ва шоҳмот, ки миёни духтарону бонувони ноҳия баргузору ҷамъбаст гардида буд, туҳфаҳои пулӣ супорид.
Дар хотимаи чорабинии тантанавии Рӯзи Модар аз ҷониби санъаткорони бахши фарҳанги ноҳия баҳри болидаруҳии иштирокчиён барномаи рангини консертии иборат аз таронаву сурудҳои марғуб пешкаш шуд.
Саҳифаи 1 аз 2
1USD
1EUR
1RUB