- Диданд: 27
Рӯз, 1- уми апрели соли 2026 дар ноҳияи Рӯдакӣ маросими тантанавии гусели ҷавонони синни даъватӣ зери унвони «Рузи даъватшаванда» дар ҳудуди қисми низомии 15018-и Вазорати мудофиаи Ҷумҳурии Тоҷикистон баргузор гардид. Дар маросими сафарбаркунии ҷавонони ноҳия муовини якуми раиси ноҳияи Рӯдакӣ, муовинони раиси ноҳия, комиссари ҳарбии ноҳияи Рӯдакӣ, роҳбарони воҳидҳои сохтории Мақомоти иҷроияи ҳокимияти давлатии ноҳия, ташкилоту муассисаҳо, раисони ҷамоатҳои шаҳраку деҳот, собиқадорони меҳнат, волидайни даъватшавандагон ва дигар ҷавонону наврасони то синни даъватӣ бо шиору овезаҳои тараннумкунандаи ормонҳои аҷдодӣ ва гиромӣ доштани арзишҳои волои инсонӣ иштирок карданд.
Ҷавонони ватандӯсту шуҷоатманд, ки бо амри дилу виҷдон ихтиёран хизмати Модар-Ватанро интихоб намудаанд, дар фазои идона ба сафи Қувваҳои Мусаллаҳи Ҷумҳурии Тоҷикистон равона карда шуданд. Маросим бо садо додани Суруди миллӣ оғоз ёфт. Муовини аввали раиси ноҳияи Рӯдакӣ Шарифзода Аҳлиддин матни табрикотии иҷрокунандаи вазифаи раиси ноҳияи Рӯдакӣ муҳтарам Салимзода Нусратуллоро ба самъи ҳозирин расонид. Зикр намуд, ки ин маърака дар асоси Фармони Президенти Ҷумҳурии Тоҷикистон аз 28 феврали соли 2026 таҳти №1146 роҳандозӣ гардида, оғози муташаккилонаи даъвати баҳориро нишон медиҳад.
Ӯ таъкид кард, ки ҷавонони ноҳия бо ҳисси баланди ватандорӣ барои адои қарзи шаҳрвандии худ равона мешаванд ва ин боиси ифтихори ҷомеа мебошад. Муовини аввали раиси ноҳия ба ҷавонон роҳи сафеду барори кор таманно намуда, ҳамзамон ба падару модарон барои тарбияи фарзандони далеру ватандӯст изҳори сипос кард. Қайд гардид, ки имрӯз Қувваҳои Мусаллаҳи кишвар аз лиҳози таъминоти моддӣ-техникӣ ва сатҳи омодагии ҳарбӣ хеле пешрафта буда, ҷавонони ноҳияи Рӯдакӣ низ дар таъмини сулҳу субот саҳми арзанда мегузоранд. Инчунин тибқи анъана маросими нонгазонӣ баргузор гардида, барномаи фарҳангии ҷолиб пешкаши ҳозирин шуд, ки ба чорабинӣ ҳусни тоза бахшид. Дар охир муовини аввали раиси ноҳияи Рӯдакӣ ва дигар шахсони расмӣ аз қисми низомии 15018 боздид ба амал оварданд. Дар ҷараёни боздид меҳмонон бо шароити будубоши сарбозон, реҷаи рӯзмарра, муҳити хизмат ва имкониятҳои фароҳамовардаи қисми ҳарбӣ аз наздик шинос шуданд ва аз тартибу интизом, сатҳи таъминот ва фазои ҳамдигарфаҳмӣ дар байни хизматчиёни ҳарбӣ изҳори қаноатмандӣ намуданд.
- Диданд: 35
Дар фазои идонаи баҳорӣ ва руҳияи болида, дар деҳаи Охтоқи ҷамоати деҳоти Қиблаӣ бахшида ба ҷашни байналмилалии Наврӯз чорабинии бошукӯҳи фарҳангӣ баргузор гардид. Дар ин ҳамоиши идона муовини аввали раиси ноҳияи Рӯдакӣ Шарифзода Аҳлиддин, мудири бахши ҷавонон ва варзиши ноҳия Маҳмудзода Орзубек, раиси Ҷамоати деҳоти Қиблаӣ Қандилҷон Каримов ва дигар шахсони расмӣ иштирок намуда, аз хони идонаи Наврӯзӣ боздид ба амал оварданд. Меҳмонон зимни шиносоӣ бо намоиши анъанаҳои миллӣ, аз ҷумла хони пурнозу неъмати Наврӯзӣ, таомҳои лазизи миллӣ, маҳсули дасти ҳунармандон ва гӯшаҳои фарҳангӣ дидан карда, ба ҳунару маҳорати сокинон баҳои баланд доданд. Ҳамзамон, дар доираи чорабинӣ бозиҳои миллии варзишӣ, аз қабили гӯштини миллӣ, бандкашӣ ва дигар мусобиқаҳои ҷолиб баргузор гардида, фазои идонаро боз ҳам рангинтар намуд. Нахуст муовини аввали раиси ноҳияи Рӯдакӣ Шарифзода Аҳлиддин сокинони ҷамоати деҳоти Қиблаиро ба ифтихори ҷашни байналмилалии Наврӯз таҳният гуфта, зикр намуд, ки Наврӯз ҳамчун ҷашни ваҳдату ҳамдилӣ мардумро ба дӯстиву меҳрубонӣ, ободкориву созандагӣ ва эҳтиром ба арзишҳои миллӣ ҳидоят менамояд. Барномаи фарҳангии рангину ҷаззоб бо иштироки ҳунармандони маҳаллӣ пешкаши ҳозирин гардида, бо суруду рақсҳои дилнишин ба чорабинӣ ҳусни тоза бахшид. Чорабинии Наврӯзӣ дар ҷамоатҳои дигари ноҳия низ бо шукуҳу шаҳомати хоса ва бо шукргузорӣ аз ваҳдату ҳамдилӣ, эҳтиром ба арзишҳои миллӣ ва анъанаҳои неки ниёгон идома дорад.
- Диданд: 26
Рӯз, 25-уми марти соли 2026 сокинони ноҳияи Рӯдакӣ ҷашни байналмилалии Наврӯзро дар фазои тантанавӣ бо шукргузорӣ аз фазои сулҳу субот ва ваҳдати миллӣ бо шукӯҳу шаҳомати хосса таҷлил намуданд. Чун анъанаи нек субҳи барвақт дар боғи фарҳангӣ-фароғатии маркази ноҳия оташи наврӯзӣ афрӯхта шуда, соли нави аҷдодӣ бо рамзи нуру гармӣ истиқбол гирифта шуд ва тантанаҳои ҷашнӣ оғоз гардид. Чорабинии тантанавии бошукӯҳ дар назди муҷассамаи устод Абуабдуллоҳ Рӯдакӣ баргузор шуд. Дар ин макон, ки қабои наврӯзӣ ба бар карда буд, намояндагони ҷамоатҳои шаҳраку деҳот, ташкилоту муассисаҳо ва сохторҳои ноҳия бо ташкили намоишгоҳи густурдаи ҳунарҳои мардумӣ, таому хӯрокҳои миллӣ, маҳсулоти нонӣ, хони наврӯзии «ҳафтсин»-у «ҳафтшин», инчунин, дастовардҳои соҳаҳои мухталиф ва бозиҳои миллии варзишӣ майдони наврӯзгоҳро идона оростанд. Дар чорабинии ҷашнӣ иҷрокунандаи вазифаи раиси ноҳияи Рӯдакӣ Нусратулло Салимзода, раиси Кумитаи давлатии идораи замин ва геодезии Ҷумҳурии Тоҷикистон – намояндаи Ҳукумати Ҷумҳурии Тоҷикистон дар ноҳияи Рӯдакӣ Ориф Хоҷазода, муовини аввал, муовинон ва роҳбари дастгоҳи раиси ноҳия, роҳбарони сохторҳои қудратӣ ва мақомоти ҳифзи ҳуқуқ, мудирони шуъбаву бахшҳои Мақомоти иҷроияи ҳокимияти давлатии ноҳия, роҳбарони ташкилоту муассисаҳо, намояндагони ҷамоатҳои шаҳраку деҳот, аҳли маорифу фарҳанг, тандурустӣ ва собиқадорону фаъолони ноҳия ширкат варзиданд. Ҳайати роҳбарияти ноҳия ва меҳмонон, сараввал, аз намоишгоҳи наврӯзии оросташуда дидан намуданд. Дар идомаи чорабинӣ паёми табрикии иҷрокунандаи вазифаи раиси ноҳияи Рӯдакӣ Салимзода Нусратулло ба муносибати ҷашни Наврӯзи байналмилалӣ шунида шуд. Дар оғози сухан Салимзода Нусратулло ҳозирин ва тамоми мардуми ноҳияи Рӯдакиро ба муносибати ҷашни Наврӯз табрику шодбош гуфта, аз аҳаммият ва азамати ин ҷашн ёдоварӣ кард. Қайд гардид, ки ҷашни Наврӯз дорои фазилатҳои неку созанда ва муттаҳидкунандаи башарият буда, ҳазорсолаҳо инҷониб дар муҳити фарҳангии халқҳои олам ҷойгоҳи сазовор пайдо намудааст. Маҳз унсурҳои инсондӯстонаи ҷашни Наврӯзро ба эътибор гирифта, Созмони умумиҷаҳонии ЮНЕСКО онро ҳамчун ҷашни байналмилалӣ эътироф намуд. Ҷашни Наврӯз миллати моро ба таври шоиста ҳамчун миллати бостониву дорои фарҳангу тамаддуни қадима ба ҷаҳониён муаррифӣ намуд. Сипас, раиси Кумитаи давлатии идораи замин ва геодезии Ҷумҳурии Тоҷикистон – намояндаи Ҳукумати Ҷумҳурии Тоҷикистон дар ноҳияи Рӯдакӣ Ориф Хоҷазода суханронӣ карда, тамоми ҳозирин ва мардуми шарифи ноҳияи Рӯдакиро аз номи Ҳукумати Ҷумҳурии Тоҷикистон ба муносибати Наврӯзи хуҷастапай табрик намуд ва ба онҳо рӯзгори орому осуда ва ба кишвари азизамон - Тоҷикистон осмони софу беғубор ва фазои сулҳу суботи абадӣ орзу кард. Пас аз суханрониҳои иштирокчиён қисмати фарҳангии чорабинӣ оғоз шуд. Дар ин қисмат ҳунармандон ва сарояндагони маъруф суруду таронаҳои ҷолибу ҷаззобро пешкаши иштирокчиён намуданд. Бо пешниҳоди барномаи рангини театркунонидашуда ва рақсу оҳангҳои мардумӣ ҳунармандони бахши фарҳанги ноҳия хотири ҳозиринро шод намуданд.
Саҳифаи 10 аз 84
1USD
1EUR
1RUB