- Диданд: 20
Рӯзи 27-уми августи соли 2024 раиси Кумитаи кор бо занон ва оилаи назди Ҳукумати Ҷумҳурии Тоҷикистон Бунафша Файзиддинзода, муовини раиси Кумита Умеда Абдуллозода, раиси собиқадорони ҲХДТ Руқия Атоева ба ноҳияи Рӯдакӣ ташриф оварданд.
Меҳмононро дар даромадгоҳи ноҳия занону бонувони фаъол бо тантана ва намоиши ҳунарҳои мардумӣ зери унвони "Тоҷикона мепӯшем" истиқбол гирифтанд.
Меҳмонон, сараввал, аз Корхонаи воҳиди давлатии "Чевар" мансуб ба соҳибкори ватанӣ Р. Сафарова, ки дар тӯли ду соли фаъолияти хеш ба истеҳсоли либосҳои ягонаи мактабӣ 25 нафар кормандонро ҳамчун дӯзандаи либосҳо ба кор ҷалб намудааст, шинос гардида, баҳри тақвият бахшидани рушди соҳибкорӣ дар самти занон маслиҳатҳои муфид доданд.
Дар идомаи боздид меҳмонон бо намоиши ҳунарҳои мардумӣ ва сару либосҳои миллии тоҷикона аз наздик ошноӣ пайдо намуда, ба ташкилкунандагон баҳои баланд доданд. Ҳамчунин, баҳри аз нав эҳë ва пос доштани ҳунарҳои мардумии занони меҳнатқарини ноҳия изҳори таҳсин хонданд.
Сипас, дар маҷлисгоҳи Мақомоти иҷроияи ҳокимияти давлатии ноҳияи Рӯдакӣ бо иштироки раиси ноҳия Абдуғаффор Ҳикматуллозода ва кормандони масъули соҳавӣ ҷаласаи сайëри Кумитаи кор бо занон ва оилаи назди Ҳукумати Ҷумҳурии Тоҷикистон баргузор гардид.
Дар ҷаласа раиси Кумитаи кор бо занон ва оилаи назди Ҳукумати Ҷумҳурии Тоҷикистон Бунафша Файзиддинзода аҳли толорро ба муносибати ҷашни бошукӯҳи 33-юмин солгарди Истиқлоли давлатии Ҷумҳурии Тоҷикистон табрик намуданд.
Сипас, дар масъалаҳои пешгирии хушунат дар оила, пешгирии ҷинояту ҷинояткорӣ дар байни наврасон, ба роҳ мондани корҳои фаҳмондадиҳӣ миëни ҷавонон, инчунин, дар мавриди ҷудошавии оилаҳои навбунëд ва масъалаи самаранок истифода намудани заминҳои наздиҳавлигӣ ибрози андеша намуданд.
Дар хотимаи ҷаласа ба соҳаҳои дахлдор баҳри пешгирии ҳама гуна амалҳои номатлуб миёни ҷавондухтарон супоришҳои дахлдор дода шуда, тақвият ёфтани ҳамкориҳо миëни соҳаҳо вазифагузорӣ гардид.
- Диданд: 75
ТАҶЛИЛИ ТАНТАНАВИИ РӮЗИ БАЙНАЛМИЛАЛИИ ОИЛА ДАР НОҲИЯИ РӮДАКӢ
Дар Ҷумҳурии Тоҷикистон оила ҳамчун ниҳоди муқаддас эътироф гардида, давлат ва Ҳукумат ҷиҳати иҷрои муқаррароту уҳдадориҳои хеш дар самти танзими муносибатҳои ҳуқуқӣ, таъмини зиндагии шоиста ва муҳайё кардани шароити созгори иҷтимоӣ барои оилаҳои ҷавон пайваста талош меварзад. Дар радифи таҷлил аз Рӯзи байналмилалии оила дар шаҳру навоҳии мамлакат конфронсу ҳамоишҳо ва чорабиниҳои сатҳи гуногун гузаронида шуда, масъалаҳои марбути оила, ҳаёти хонаводагӣ, тарбияи фарзандон ва ғайра мавриди баррасӣ қарор мегиранд.
Ба истиқболи Рӯзи байналмилалии оила рӯзи 13-уми майи соли 2024 бо ташаббуси бахши сабти асноди ҳолати шаҳрвандии Мақомоти иҷроияи ҳокимияти давлатии ноҳияи Рӯдакӣ дар толори Қасри фарҳанги ноҳия ҷамъомади тантанавӣ доир гардид.
Муовини раиси ноҳияи Рӯдакӣ Муҳаммадшариф Бобошоҳзода бо сухани ифтитоҳӣ ба ҷамъомад ҳусни оғоз бахшида, ҳозиринро ба муносибати Рӯзи байналмилалии оила табрик намуд. Зикр гардид, ки гиромӣ доштани оила ҷузъи муҳимми фарҳанги волои мардуми мо ба шумор меравад. Аз ин рӯ, ҳар яки моро зарур аст, ки баҳри пойдории оила, тақвияти мақоми оила ҳамчун ниҳоди муқаддас ва пешгирии ҷудошавии оилаҳои ҷавон саъю кӯшиш намоем.
Дар идома, мудири бахши сабти асноди ҳолати шаҳрвандии ноҳия Зебониссо Расулзода оид ба мавзуъҳои ҳуқуқу уҳдадориҳо, муносибат, вазифа ва рисолати оила дар ҷомеа суханронӣ намуд. Ӯ зикр кард, ки дар таълиму тарбияи насли наврас, пеш аз ҳама, падару модар саҳми аввалиндараҷа доранд. Волидонро мебояд, ки барои ташаккули ҷомеаи солим ба таълиму тарбияи фарзанд ва таъмини фазои созгори оилавӣ диққати ҷиддӣ диҳанд.
Дар ҷараëни ҷамъомад ба чор ҷуфт навхонадорон шаҳодатномаи ақди никоҳ тақдим гардида, ҳамзамон ба волидони ҳашт нафар тифлакони навзод шаҳодатномаи таваллуд дода шуд.
Инчунин, аз ҷониби бахши сабти асноди ҳолати шаҳрвандии ноҳия се оилаи намунавӣ муайян ва бо Ифтихорномаву туҳфаҳои хотиравӣ қадрдонӣ гардиданд. Ҷойи аввал ба оилаи Султоновҳо аз ҷамоати деҳоти Чоргултеппа дода шуд. Аз ин оилаи намунавӣ чор нафар дар сафи Қувваҳои Мусаллаҳи кишвар хизмат намудааст. Ҷойи дуюмро ба оилаи Шариповҳо аз ҷамоати деҳоти Роҳатӣ доданд. Ҷойи сеюм ба оилаи Алиевҳо аз ҷамоати деҳоти Гулистон, ки се нафар фарзандашон хизмати Модар-Ватанро адо кардаанд, сазовор дониста шуд.
Бояд қайд намуд, барои муайян намудани оилаи намунавӣ дар сатҳи ҷамоатҳо низ озмун баргузор гардида буд. Оилаҳои намунавӣ аз ҷамоатҳои шаҳраку деҳоти ноҳия, аз ҷумла, оилаи Азизовҳо аз ҷамоати шаҳраки Сомониён, оилаи Алибековҳо аз ҷамоати деҳоти Зайнабобод ва дигар оилаҳои намунавӣ, ки дар сатҳи ҷамоат ғолиб гардида буданд, дар чорабинӣ ширкат варзиданд.
Дар хотимаи ҷамъомад аз ҷониби сарояндаи ҷавону умедбахш Вайсиддини Шариф ва ҳунармандони бахши фарҳанги ноҳия базми савту суруд ва барномаи рангини консертӣ манзури иштирокдорон гардид.
- Диданд: 69
ОЗМУНИ "КАДБОНУИ БЕҲТАРИН"
Дар санаи 9-уми марти соли 2024 дар боғи фарҳангӣ-фароғатии ноҳия даври ноҳиявии озмуни “Кадбонуи беҳтарин” баргузор гардид. Дар озмун занони соҳибзавқу ҳунармандони моҳир иштирок карда, ҳама намуди таомҳои миллии тоҷиконаро омода намуда, ба маърази тамошо гузоштанд.
Раиси ноҳияи Рӯдакӣ Абдуғаффор Ҳикматуллозода бо ҳамроҳии муовини якум, роҳбари дастгоҳи ноҳия ва раисони ҷамоатҳои шаҳраку деҳот аз чорабинӣ дидан карда, ба ҳунари иштирокчиён баҳои баланд дода, ба онҳо бурдбориҳо орзу намуданд.
Бояд гуфт, ки мақсад аз баргузории озмун ҳавасмандгардонии занону бонувони ҳунарманд ва эҳёи таомҳои миллӣ ва омода кардани ҷавондухтарон ба ҳаёти мустақилона, баланд бардоштани маърифати хонадорӣ ва завқи дастархонороии онҳо мебошад.
Пас аз натиҷагирии озмун ғолибон бо Сипоснома, туҳфаҳои пулӣ ва хотиравии Мақомоти иҷроияи ҳокимияти давлатии ноҳияи Рӯдакӣ мукофотонида шуданд
Саҳифаи 1 аз 3
1USD
1EUR
1RUB