- Диданд: 145
ТАҶЛИЛИ ТАНТАНАВИИ РӮЗИ БАЙНАЛМИЛАЛИИ ОИЛА ДАР НОҲИЯИ РӮДАКӢ
Дар Ҷумҳурии Тоҷикистон оила ҳамчун ниҳоди муқаддас эътироф гардида, давлат ва Ҳукумат ҷиҳати иҷрои муқаррароту уҳдадориҳои хеш дар самти танзими муносибатҳои ҳуқуқӣ, таъмини зиндагии шоиста ва муҳайё кардани шароити созгори иҷтимоӣ барои оилаҳои ҷавон пайваста талош меварзад. Дар радифи таҷлил аз Рӯзи байналмилалии оила дар шаҳру навоҳии мамлакат конфронсу ҳамоишҳо ва чорабиниҳои сатҳи гуногун гузаронида шуда, масъалаҳои марбути оила, ҳаёти хонаводагӣ, тарбияи фарзандон ва ғайра мавриди баррасӣ қарор мегиранд.
Ба истиқболи Рӯзи байналмилалии оила рӯзи 13-уми майи соли 2024 бо ташаббуси бахши сабти асноди ҳолати шаҳрвандии Мақомоти иҷроияи ҳокимияти давлатии ноҳияи Рӯдакӣ дар толори Қасри фарҳанги ноҳия ҷамъомади тантанавӣ доир гардид.
Муовини раиси ноҳияи Рӯдакӣ Муҳаммадшариф Бобошоҳзода бо сухани ифтитоҳӣ ба ҷамъомад ҳусни оғоз бахшида, ҳозиринро ба муносибати Рӯзи байналмилалии оила табрик намуд. Зикр гардид, ки гиромӣ доштани оила ҷузъи муҳимми фарҳанги волои мардуми мо ба шумор меравад. Аз ин рӯ, ҳар яки моро зарур аст, ки баҳри пойдории оила, тақвияти мақоми оила ҳамчун ниҳоди муқаддас ва пешгирии ҷудошавии оилаҳои ҷавон саъю кӯшиш намоем.
Дар идома, мудири бахши сабти асноди ҳолати шаҳрвандии ноҳия Зебониссо Расулзода оид ба мавзуъҳои ҳуқуқу уҳдадориҳо, муносибат, вазифа ва рисолати оила дар ҷомеа суханронӣ намуд. Ӯ зикр кард, ки дар таълиму тарбияи насли наврас, пеш аз ҳама, падару модар саҳми аввалиндараҷа доранд. Волидонро мебояд, ки барои ташаккули ҷомеаи солим ба таълиму тарбияи фарзанд ва таъмини фазои созгори оилавӣ диққати ҷиддӣ диҳанд.
Дар ҷараëни ҷамъомад ба чор ҷуфт навхонадорон шаҳодатномаи ақди никоҳ тақдим гардида, ҳамзамон ба волидони ҳашт нафар тифлакони навзод шаҳодатномаи таваллуд дода шуд.
Инчунин, аз ҷониби бахши сабти асноди ҳолати шаҳрвандии ноҳия се оилаи намунавӣ муайян ва бо Ифтихорномаву туҳфаҳои хотиравӣ қадрдонӣ гардиданд. Ҷойи аввал ба оилаи Султоновҳо аз ҷамоати деҳоти Чоргултеппа дода шуд. Аз ин оилаи намунавӣ чор нафар дар сафи Қувваҳои Мусаллаҳи кишвар хизмат намудааст. Ҷойи дуюмро ба оилаи Шариповҳо аз ҷамоати деҳоти Роҳатӣ доданд. Ҷойи сеюм ба оилаи Алиевҳо аз ҷамоати деҳоти Гулистон, ки се нафар фарзандашон хизмати Модар-Ватанро адо кардаанд, сазовор дониста шуд.
Бояд қайд намуд, барои муайян намудани оилаи намунавӣ дар сатҳи ҷамоатҳо низ озмун баргузор гардида буд. Оилаҳои намунавӣ аз ҷамоатҳои шаҳраку деҳоти ноҳия, аз ҷумла, оилаи Азизовҳо аз ҷамоати шаҳраки Сомониён, оилаи Алибековҳо аз ҷамоати деҳоти Зайнабобод ва дигар оилаҳои намунавӣ, ки дар сатҳи ҷамоат ғолиб гардида буданд, дар чорабинӣ ширкат варзиданд.
Дар хотимаи ҷамъомад аз ҷониби сарояндаи ҷавону умедбахш Вайсиддини Шариф ва ҳунармандони бахши фарҳанги ноҳия базми савту суруд ва барномаи рангини консертӣ манзури иштирокдорон гардид.
- Диданд: 272
МАҶЛИСИ ҶАМЪБАСТИ СЕМОҲАИ АВВАЛИ СОЛИ 2024
12-уми апрели соли 2024 дар толори Мақомоти иҷроияи ҳокимияти давлатии ноҳияи Рӯдакӣ маҷлиси ҷамъбасти натиҷаҳои рушди иҷтимоию иқтисодии ноҳияи Рӯдакӣ дар 3-моҳаи аввали соли 2024 ва вазифаҳо барои 3-моҳаи дуюм баргузор гардид.
Дар кори маҷлис раиси ноҳия Абдуғаффор Ҳикматуллозода, муовини раиси Агентии геодезӣ ва заминсозии назди Ҳукумати Ҷумҳурии Тоҷикистон Зикриё Абдуллозода, муовинони раиси ноҳия, роҳбари дастгоҳ, мудирони шуъбаву бахшҳои мақомоти иҷроияи ҳокимияти давлатии ноҳия, вакилони халқ, роҳбарони сохторҳои қудратӣ, раисони ҷамоатҳои шаҳраку деҳот ва роҳбарони ташкилоту идораҳо иштирок доштанд.
Маҷлис бо сухани ифтитоҳии раиси ноҳия Абдуғаффор Ҳикматуллозода оғоз шуд.
Дар идома муовини якуми раиси ноҳия Аҳлиддин Шарифзода доир ба натиҷаҳои рушди соҳаҳои иқтисодию иҷтимоии ноҳия дар 3-моҳаи аввали соли 2024 баромад намуда, оид ба дастоварду мушкилоти давраи ҳисоботӣ гузориши муфассал пешниҳод кард. Зикр гардид, ки нақшаи буҷети ноҳия аз рӯйи контингент дар 3-моҳаи аввали соли 2024 ба маблағи 63 млн 865 ҳазор сомонӣ ё ин ки 108 % иҷро гардид, ки нисбати нақша 4 млн 990 ҳазор сомонӣ зиёд мебошад.Нақшаи қисми даромади буҷети маҳаллӣ бошад, ба маблаги 55 млн 364 ҳазор сомонӣ иҷро гардидааст, ки ин нишондод 109 фоизи нақшаро дар бар мегирад ва аз нақшаи пешбинигардида 4 млн 614 ҳазор сомонӣ зиёд аст.
Қайд гардид, ки новобаста аз иҷроиши барзиёди қисми даромади буҷети ноҳия камбудиҳо дар ҷамъоварии бақияпулиҳои андоз ҷой дорад. Бинобар ин, нозироти андози ноҳия ва раёсати молия вазифадор шуданд, ки барои ҳалли ин масъала ва фарогирии манбаъҳои нави андозбандӣ чораҷӯйӣ намоянд.
Дар давраи ҳисоботӣ ҳаҷми истеҳсоли маҳсулоти кишоварзӣ дар ҳамаи шаклҳои хоҷагидорӣ бо маблағи 86 млн 395 ҳазор сомонӣ амалӣ гардидааст, ки нисбати ҳамин давраи соли гузашта 105.5%-ро ташкил медиҳад. Аммо дар ин самт низ ҳанӯз камбудиҳо ба назар мерасанд. Аз ҷумла, қайд шуд, ки айни замон дурнамои кишти картошка ва сабзавот ба пуррагӣ таъмин нашудааст. Кишти картошка 30.5% ва сабзавот 6.0%-ро ташкил медиҳад. Бинобар ин, раёсати кишоварзӣ, раисони ҷамоатҳои шаҳраку деҳот ва хоҷагидорон вазифадор шуданд, ки заминҳои обиро аз алафҳои бисёрсола холӣ намуда, дар он кишти пахта ва сабзавотро ба роҳ монанд.
Ҳамчунин, ба идораи давлатии беҳдошти замин ва обёрии ноҳия ва ҷамоатҳои шаҳраку деҳот супориш дода шуд, ки ҷиҳати ҷамъовароии саривақтии маблағи истифодаи об, таъмири пойгоҳҳои обкашӣ, хоҷагидоронро дар мавсими кишт бо оби полезӣ таъмин намояд.
Гуфта шуд, ки талошҳои мақомоти иҷроияи ҳокимияти давлатии ноҳия дар якҷоягӣ бо сохторҳои ҳифзи ҳуқуқ дар самти истифодаи замин натиҷаи дилхоҳ додааст. Барои истифодаи ғайримақсадноки замин нисбати шахсони воқеӣ ва ҳуқуқӣ маводҳо тартиб дода шуда, нисбати онҳо ҷарима ба маблағи 44 500 сомонӣ татбиқ гардид.
Қайд гардид, ки дар давраи ҳисоботӣ дар назди муассисаҳои таълимии ноҳия 10 синфхонаи иловагӣ барои 1322 ҷойи нишаст сохта ба истифода дода шудааст. Инчунин, сохтмони 161 синфхонаҳои иловагӣ дар муассисаҳои таълимии ноҳия барои 4025 ҷойи нишаст идома дорад. Вале дар баробари дастовардҳо дар соҳаи маорифи ноҳия камбудиҳо низ ҷой доранд. Бештар аз тарафи хонандагон вайрон намудани талаботи моддаи 90-и Кодекси ҳуқуқвайронкунии маъмурӣ ба назар мерасад.
Раёсати маорифи ноҳия оид ба ислоҳи камбудиҳо дар самти кам будани муассисахои томактабӣ, нарасидани ҷойи нишаст, норасоии асбобҳои физикӣ ва моддаҳои химиявӣ барои таҷҳизонидани кабинетҳои фании физика, химия, биология ва норасоии китобҳои дарсӣ вазифадор гардид.
Зикр шуд, ки дар семоҳаи аввали соли 2024 аз хисоби маблағҳои буҷет, соҳибкорон ва сокинони ноҳия 3 адад бунгоҳи тиббӣ сохта ба истифода дода шуда, сохтмони 4 адад бунгоҳи тиббии дигар дар марҳилаи анҷомёбист. Сохтмони бинои замонавии ёрии таъҷилӣ аз ҳисоби маблағҳои буҷетии ноҳия идома дорад.
Дар хотимаи маҷлис раиси ноҳия Абдуғаффор Ҳикматуллозода суханронӣ намуда, ба масъулин ҷиҳати бартарафсозии мушкилиҳои мавҷуда супоришҳои мушаххас дод.
Дар умум, натиҷаҳои рушди иҷтимоию иқтисодии нохия дар 3-моҳаи аввали соли 2024 бо назардошти рушду пешрафт ва ислоҳи камбудиҳои ҷойдошта қаноатбахш ҳисобида шуда, бо назардошти баромад ва пешниҳодҳо қарорҳои дахлдор қабул гардид.
- Диданд: 268
29 марти соли 2024 дар толори Мақомоти иҷроияи ҳокимияти давлатии ноҳияи Рӯдакӣ таҳти раёсати раиси ноҳия Абдуғаффор Ҳикматуллозода Иҷлосияи бистуякуми Маҷлиси вакилони халқи ноҳияи Рӯдакӣ, даъвати шашум баргузоргардид.
Пас аз интихоби котибот вакилон рӯзномаи Иҷлосияи навбатиро бо шаш масъала тасдиқ намуданд.
Тибқимасъалаи якуми рӯзнома вобаста ба ҷараёни татбиқи дастуру супоришҳое, ки аз Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олии ҶумҳурииТоҷикистон аз 28 декабри соли 2023 "Дар бораи самтҳои асосии сиёсати дохилӣ вахориҷии ҷумҳурӣ" бармеоянд, ахбороти муовини раисиноҳия Муҳаммадшариф Бобошоҳзода шунида шуд. Бахусус, оид ба Нақшаи-чорабиниҳои тасдиқшуда дар ин самт, амалисозии бандҳои дахлдори он, рушди соҳаҳои иқтисодиву иҷтимоӣ, саноату сохтмон, маорифу фарҳанг, баланд бардоштани маърифати ҳуқуқии шаҳрвандон ва ҳалли як зумра мушкилоти мавҷудаи маҳаллӣ диққати махсус равона карда шуд.
Дар музокироти масъалаи мазкур вакили халқӣ Адабҷон Ҳасанзода оид ба корҳои анҷомдодашуда дар самти ба роҳ мондани пардохтҳои ғайринақдии хизматрасониҳои давлатӣ дар ноҳия изҳори назар намуда, ҳамзамон, аз ҷониби номбурда таклиф гардид, ки дар баробари ташкилоту муассисаҳои давлатӣ дигарташкилотҳои ғайридавлатӣ ва шахсони ҳуқуқӣ низ бояд ба низоми пардохти ғайринақдӣ гузаронида шаванд.
Вобаста ба масъалаи дуюми рӯзнома ҳисоботи Комиссияи доимии Маҷлиси вакилони халқи ноҳия оид ба соҳаи кишоварзӣ ва ҳифзи муҳити зист доир ба фаъолияти Комиссия дар давраи ҳисоботӣ аз ҷониби раиси Комиссияи мазкур, вакили халқӣ Аҳлиддин Шарифзода ба маълумоти вакилон расонида шуд. Дар музокироти масъалаи мазкур сардори Раёсати кишоварзии ноҳия Бахтиёр Халилов баромад намуда, камбудиҳои ҷойдоштаро дар фаъолияти баъзе ташкилоту хоҷагиҳои соҳаи кишоварзӣ масъалагузорӣ намуд. Зимнан, роҳбарони сохтории Мақомоти иҷроияи ҳокимияти давлатии ноҳия, ҷамоатҳои шаҳраку деҳот ва хоҷагиҳо ҷиҳати таъмини иҷрои дурнамои кишт, баланд бардоштани маданияти истифодабарии замин, гирифтани на кам аз 2-3 ҳосил, вусъати корҳои обёрию кабудизоркунӣ ва ислоҳи саривақтии камбудиҳои ҷойдошта аз тарафи раиси ноҳия вазифадор карда шуданд.
Дар идомаи кори Иҷлосия вакилони халқи ноҳия масъалаи номгузории муассисаи таҳсилоти миёнаи умумии №67 деҳоти Чоряккоронро ба номи собиқадори соҳаи маориф, доктори илмҳои филологӣ, профессор, марҳум Ҳомид Маҷидов мавриди муҳокима қарор доданд.
Доир ба масъалаи чоруми рӯзнома вакилон бо қабули қарори дахлдор ба қарори Маҷлиси вакилони халқи ноҳияи Рӯдакӣ аз 30 июни соли 2023, №168 тағйирот ворид намуданд, ки мувофиқи он минбаъд ба шахсониҳуқуқӣ, ки дорои иҷозатномаи махсус мебошанд, барои сохтмони биноҳои баландошёна дар ҳудуди ноҳияи Рӯдакӣ на зиёда аз 3 бино (блок) иҷозат дода мешавад.
Тибқи масъалаҳои дигари рӯзномаи Иҷлосияи навбатӣ масоили тағйироти кадрӣ ва тасдиқи як қатор қарорҳои раиси ноҳия, ки дар байни Иҷлосияҳои бистум ва бистуякуми Маҷлиси вакилони халқи ноҳия қабул гардидаанд, мавриди баррасии вакилон қарор дода шуд.
Дар маҷмуъ, аз рӯйи ҳамаи масъалаҳои барраси шуда дар Иҷлосияи навбатӣ аз ҷониби вакилони халқи ноҳияи Рӯдакӣ 8 қарор қабул гардид.
Саҳифаи 28 аз 82
1USD
1EUR
1RUB